Íþróttir

Einar hættur með kvennalið Víkings

Einar Guðnason er hættur sem þjálfari kvennaliðs Víkings eftir fall liðsins úr Bestu deildinni. Hann tók við liðinu í fallbaráttu á síðasta ári og tókst þá að halda því í deildinni.

Ritstjórn Hnýsis · Birt 31. október 2026, kl. 11:27

Víkingur greindi frá starfslokum Einars Guðnasonar sem þjálfara kvennaliðs félagsins og þakkaði honum fyrir störf hans. RÚV segir Einari hafa verið sagt upp en Fótbolti.net greinir frá því að hann hafi látið af störfum.

Einar tók við liðinu um mitt síðasta keppnistímabil þegar það var í fallbaráttu. Honum tókst að halda Víkingi í Bestu deildinni þá, en liðið féll úr deildinni í ár. Fallið réðst ekki fyrr en í lokaumferðinni.

Einar er uppalinn hjá Víkingi og starfaði áður lengi sem aðstoðarþjálfari Arnars Gunnlaugssonar hjá karlaliði félagsins.

Þjálfaraskipti hjá báðum fallliðunum

Valur féll einnig úr Bestu deildinni. Matthías Guðmundsson var látinn fara frá félaginu og Eiríkur Raphael Elvy ráðinn í hans stað. Þjálfaraskipti hafa því orðið hjá báðum liðunum sem féllu.