Innlent

Flóttamannaleið aftur opin eftir bílveltu

Flóttamannaleið við Vífilsstaðavatn hefur verið opnuð aftur eftir að henni var lokað vegna bílveltu í morgun. Ekki var talið líklegt að flytja þyrfti þann sem var í bílnum á sjúkrahús.

Ritstjórn Hnýsis · Birt 30. október 2026, kl. 16:05

Flóttamannaleið við Vífilsstaðavatn var lokuð tímabundið vegna bílveltu á áttunda tímanum í morgun. Vegurinn var síðar opnaður á ný. Löng bílaröð myndaðist á meðan lokunin stóð yfir.

Einn var í bílnum. Samkvæmt upplýsingum Slökkviliðs höfuðborgarsvæðisins var ekki talið líklegt að meiðsli viðkomandi krefðust flutnings á sjúkrahús.

Vegagerðin benti jafnframt á hálkubletti á höfuðborgarsvæðinu og hvatti vegfarendur til að aka varlega.