Innlent
Björgunarfélagið segir Þór hafa flutt sjúkling vegna þoku
Björgunarskipið Þór flutti sjúkling frá Vestmannaeyjum til Landeyjahafnar á hæsta forgangi, samkvæmt Björgunarfélagi Vestmannaeyja. Þoka kom í veg fyrir að þyrla Landhelgisgæslunnar gæti lent í Eyjum.
Ritstjórn Hnýsis · Birt 3. nóvember 2026, kl. 11:00
Fór sjóleiðina frá Vestmannaeyjum
Vakthafandi læknir í Vestmannaeyjum óskaði eftir aðstoð Björgunarfélags Vestmannaeyja við að flytja sjúkling hluta leiðarinnar til Reykjavíkur. Samkvæmt færslu félagsins var áhöfn björgunarskipsins Þórs kölluð út á hæsta forgangi.
Ákveðið var að flytja sjúklinginn sjóleiðina þar sem þoka hindraði lendingu þyrlu Landhelgisgæslunnar í Vestmannaeyjum. Hálftíma eftir að beiðnin barst var sjúklingurinn kominn til Landeyjahafnar, að því er fram kemur í frétt RÚV um tilkynningu björgunarfélagsins.
Sjúkrabíll tók þar við sjúklingnum og flutti hann áfram til Reykjavíkur. Björgunarfélagið þakkaði áhöfn Þórs fyrir skjót viðbrögð og óskaði sjúklingnum góðs bata.
