Viðskipti
Verksmiðjustjóri segir olíu ódýrari en rafmagn
Að sögn Unnars Hólms Ólafssonar verksmiðjustjóra gengur fiskimjölsverksmiðja Vinnslustöðvarinnar í Vestmannaeyjum fyrir olíu þrátt fyrir nýjan sæstreng. Hann segir raforkuverðið ráða þeirri ákvörðun.
Ritstjórn Hnýsis · Birt 3. nóvember 2026, kl. 15:01
Segir notkunina allt að 25 þúsund lítra á sólarhring
Unnar Hólm Ólafsson, verksmiðjustjóri fiskimjölsverksmiðju Vinnslustöðvarinnar í Vestmannaeyjum, segir olíu umtalsvert ódýrari orkukost en rafmagn fyrir verksmiðjuna. Hún sé því knúin með olíu þótt nýr sæstrengur sé kominn til Vestmannaeyja.
Að sögn Unnars brennir verksmiðjan 18 til 25 þúsund lítrum af olíu á sólarhring þegar vinnsla stendur yfir. Ummælin komu fram í myndbandsviðtali sem birt var á vef Vinnslustöðvarinnar. Tígull greinir frá því að nýi sæstrengurinn hafi verið tekinn í notkun fyrr á árinu.
